Fjala përshëndetëse e Ambasadorit Gjerman Peter Zingraf
Të dashur miq dhe mikesha të kulturës,
këto ditë bota rreth nesh nuk po na e bën të lehtë të përjetojmë çaste shkujdesjeje. Pas tërmetit dhe pandemisë këtë vit patëm edhe sulmin e Rusisë kundër Ukrainës, pasojat e të cilit po i ndjejmë të gjithë, emocionalisht si empati për viktimat, por edhe në formë të pasigurisë ekonomike dhe shoqërore.
Pikërisht në këto kohë të vështira kultura nuk është luks. Ajo mund të na dhurojë momente të shkujdesura dhe shëlbuese, mund të na sjellë më pranë njëri-tjetrit dhe të na bëjë ta shohim botën nën një dritë tjetër. Ndaj motoja e „Tetorit Gjerman 2022“ është pikërisht „Përndritje“.
Edhe këtë herë keni mundësi të zgjidhni mes një shumësie aktivitetesh – shfaqje filmash, koncerte, kërcim, ekspozita, mbrëmje leximi, referate e shumë të tjera. Do të bashkojmë krijues të artit të dy vendeve tona me përvojat e tyre nga Gjermania dhe Shqipëria – dhe ju do të mund të shijoni frutet e këtij bashkëpunimi.
Krahas kësaj këtë vit do të përfaqësohen në mënyrë të spikatur edhe projekte të Bashkëpunimit për Zhvillim. Ne duam të tregojmë se në ç’larmi mënyrash e mbështesim Shqipërinë si partner, me dobi të drejtpërdrejtë për qytetaret dhe qytetarët, veçanërisht në kohë sfidash dhe në rrugën e bisedimeve të anëtarësimit.
„Tetori Gjerman“ është punë në skuadër. Aty merr pjesë jo vetëm Ambasada Gjermane në Tiranë, por edhe Instituti Goethe, Programi Gjerman për Shkëmbimet Akademike DAAD, GIZ dhe një sërë partnerësh të tjerë. Një falënderim i përzemërt të gjithëve.
Programi ynë onlinë si dhe aplikacioni për aparate celularë „Tetori Gjerman“ jua bëjnë të lehtë të keni një pamje të përgjithshme të aktiviteteve të shumta. Për disa aktivitete është i nevojshëm rezervimi paraprak. Në rast reshjesh mund të ndodhë, që aktiviteti të zhvendoset në një vend alternativ. Ndaj lutemi të shfrytëzoni këtë ofertë për të qëndruar të informuar edhe rreth ndryshimeve të mundshme.
Uroj për të gjithë një „Tetor Gjerman“ interesant, të gëzuar, befasues dhe përndritës me shumë perspektiva të reja të bashkëpunimit mes vendeve tona.
Shumë përzemërsisht,
Peter Zingraf
Ambasadori Gjerman në Shqipëri
